Ertu metnaðarfull(ur) og brennur fyrir leikskólastarfi? Viltu vera hluti af skóla sem leggur áherslu á umhverfi, útinám og umhyggju? Við í Undralandi leggjum mikla á herslu á virðingu fyrir börnum og að koma til móts við ólíkar þarfir þeirra. Hver einstaklingur skiptir máli, við vinnum með jákvæða nálgun þar sem umhyggja, stuðningur, hlýja og styrkleikar hvers barns eru í forgrunni. Þetta skólaár er unnið að innleiðingu á agastefnunni „jákvæðum aga“. Í Undralandi eru rúmlega 50 börn á þremur deildum, yngsta deildin er nýflutt í sér húsnæði. Undraland er ört stækkandi skóli í einstöku umhverfi. Við bjóðum: Lifandi og skapandi vinnuumhverfi Teymisvinnu og faglegt nám Áherslu á útinám og umhverfismennt Tækifæri til að hafa áhrif á þróun skólastarfsins Stuðning í starfi Menntunar- og hæfniskröfur: Leyfisbréf kennara með áherslu á leikskólastarf eða aðra sambærilega menntun Góð íslenskukunnátta er skilyrði Frumkvæði og metnaður í starfi Jákvæðni og góð hæfni í mannlegum samskiptum Reynsla í starfi með leikskólabörnum Virðing og áhugi á að vinna með börnum Hreint sakavottorð Sæktu um og vertu hluti af framsæknu leikskólastarfi í friðsælu umhverfi. Ef ekki fást leikskólakennarar verða leiðbeinendur ráðnir timabundið. Nánari upplýsingar veitir Jóna Björg Jónsdóttir leikskólastjóri S: 4806620 /8983077 og jona@undraland.is Umsóknir með ferilskrá sendist á jona@undraland.is Umsóknarfrestur til 15. mars 2026.
Lubba- og lestrarátak í Undralandi – marsmánuður Í mars ætlum við að vera með skemmtilegt Lubba- og lestrarátak í Undralandi. Markmiðið er að efla málþroska barnanna, auka áhuga þeirra á bókum og styrkja samstarf heimilis og leikskóla í kringum læsi og málörvun. Lubbi gegnir mikilvægu hlutverki í málræktarstarfinu og hjálpar börnum að tengja saman hljóð og stafi á leikandi og skemmtilegan hátt. Foreldrar eru hvattir til að kynna sér málhljóð sín og barna sinna og ræða þau heima. Hægt er að horfa á barnakór syngja öll Lubba-lögin á YouTube þar sem einnig má sjá táknin sem fylgja. Einnig er hægt að horfa á stutta Lubba-þætti í Sjónvarp Símans. Lestrarátak Í tengslum við verkefnið fer fram lestrarátak þar sem börnin skrá á morgnana hvaða bók var lesin heima daginn áður. Bókin má vera af hvaða tagi sem er – aðalatriðið er samveran og lesturinn. Reglulegur lestur og samtal um efni bókarinnar styður við orðaforða, lesskilning og tjáningu barnanna og er mikilvægur þáttur í málörvun. Bók dagsins – barn kynnir bók Eitt barn á dag fær tækifæri til að koma með bók að heiman eða af bókasafni og kynna hana fyrir hinum börnunum í samverustund. Verkefnið er liður í að efla sjálfstraust, tjáningu og frásagnarhæfni barnanna ásamt því að deila lestraráhuga með hópnum. Samstarf við bókasafnið Bókasafnið tekur þátt í verkefninu og verður nýtt fjölbreytt úrval bóka þaðan til að styðja við átakið. Hvatt er til þess að nýta bókasafnið reglulega og gera lestur að ánægjulegri og uppbyggilegri samverustund. Fram undan er skemmtilegur og lærdómsríkur mánuður þar sem Lubbi og bækurnar fá að njóta sín í öflugri málrækt og lestrargleði.
Starfið í leikskólanum hefur gengið afar vel í vetur. Við erum einstaklega heppin með öflugt, samheldið og faglegt starfsfólk sem leggur sig fram af alúð og metnaði á hverjum degi til að skapa hlýtt, öruggt og hvetjandi umhverfi fyrir börnin. Eins og þið kannski vitið þá er fyrirhugað að Grænhóll (yngsta deildin) flytji yfir í gamla ráðhúsið. Við ætlum að kalla deildina áfram Grænhól og þá húsið líka á meðan við erum þar. Þegar börnin sem eru á Grænhól mæta eftir áramót eða þann 5. janúar þá koma þau á nýja Grænhól (gamla ráðhúsið). Við þetta myndast meira pláss í leikskólahúsinu sjálfu og við getum tekið inn fleiri börn en áður og fáum meira rými bæði fyrir starfsmannaaðstöðu og leikrými fyrir börnin. Þessi lausn er hugsuð tímabundið ca 3 ár, á meðan verið er að hanna/teikna og byggja viðbyggingu við leikskólann. Karellen kerfið er að fara að hætta og Í staðinn fyrir Karellen kerfið fáum við kerfi sem heitir Vala og er svipað og Karellen. Við byrjum á innleiðingu á Völu í janúar og ekki er komin nákvæm tímasetning hvenær við skiptum yfir en þið verð látin vita þegar það verður. Varðandi myndir í Karellen þá munu þær ekki flytjast yfir í Völu og þið þurfið að sækja þær myndir sem eru í Karellen ef þið viljið eiga. Gott er að gera það sem fyrst en þið verði látin vita þegar við vitum betur fyrir hvað tíma þarf að vera búið að sækja myndirnar. Ég sendi ykkur hlýjar kveðjur og innilegt þakklæti fyrir samstarfið það sem af er vetri. Börnin ykkar eru sannarlega dásamleg, hvert og eitt á sinn einstaka hátt. Opinskátt samtal og gagnkvæmur skilningur skipta miklu máli í skólastarfi, og það hefur verið ánægjulegt að finna hversu vel við höfum unnið saman að sameiginlegu markmiði þ.e. að styðja börnin sem best. Það er okkur starfsfólki Undralands mikill heiður að fá að fylgja þeim í leik og námi. Með vissu um áframhaldandi gott samstarf óska ég ykkur öllum gleðilegra jóla og farsældar á nýju ári.
Frá og með áramótum höfum við sagt upp vefsíðunni okkar sem var undir Karellen. Þar sem Karellen hættir árið 2027, þá höfum við verið að vinna í þessari vefsíðu með Stefnu. Við erum spennt fyrir því að deila nýjum breytingum með ykkur og vonumst til að nýja vefsíðan mun bjóða upp á áhugaverða eiginleika og bætta þjónustu. Ef þú hefur einhverjar ábendingar, spurningar eða þarf á aðstoð að halda, ekki hika við að hafa samband.